‘దుబ్బాక తరహా విజయం అందించండి’

దుబ్బాక ఎమ్మెల్యే రఘునందన్‌రావు

హైదరాబాద్‌: సీఎం కేసీఆర్‌ పుట్టిన గడ్డపై కాషాయ జెండా ఎగురుతుందని దుబ్బాక ఎమ్మెల్యే రఘునందన్‌రావు అన్నారు. సిద్దిపేట గడ్డమీద పోలీసులు బెదిరించినా భాజపా కార్యకర్తలు అండగా ఉన్నారని చెప్పారు. ఎమ్మెల్యేగా  ప్రమాణస్వీకారం చేసిన అనంతరం భాజపా కార్యాలయంలో నిర్వహించిన మీడియా సమావేశంలో రఘునందన్‌రావు మాట్లాడారు. ఉపఎన్నిక సమయంలో  హైదరాబాద్, రాచకొండ, సిద్దిపేట పోలీస్‌ కమిషనర్లు తీవ్ర ఇబ్బందులకు గురిచేశారని.. పోలీసులు అధికార పార్టీకి అనుకూలంగా వ్యవహరిస్తున్నారని  ఆరోపించారు. పోలీసు అధికారులు చట్టానికి వ్యతిరేకంగా పనిచేస్తే శిక్ష తప్పదన్నారు. దుబ్బాకలో తనకెలాంటి అవకాశం ఇచ్చారో గ్రేటర్‌ హైదరాబాద్‌ ఎన్నికల్లో అలాంటి విజయం అందించాలని రఘునందన్‌ కోరారు. దుబ్బాక ఎన్నికల్లో గెలిపించి శాసనసభకు పంపించిన దుబ్బాక ప్రజలకు శిరస్సు వంచి నమస్కరిస్తున్నట్లు చెప్పారు.