బిహార్‌ బరి: భాజపా, ఆర్జేడీ హోరాహోరీ

పట్నా: బిహార్‌ అసెంబ్లీ ఎన్నికల ఫలితాలు క్షణక్షణం ఉత్కంఠను రేపుతున్నాయి. ఇప్పటివరకు వెలువడిన ఫలితాల సరళిని చూస్తే.. ఆధిక్యంలో ఎన్డీయే, మహాగట్‌ బంధన్‌ కూటమి తీవ్రంగా పోటీపడుతున్నాయి. ఇక భాజపా, రాష్ట్రీయ జనతాదళ్‌ల మధ్య కూడా ఆధిక్యం దోబూచులాడుతోంది. ప్రస్తుతం భాజపా 68 స్థానాల్లో ఆధిక్యంలో ఉండగా.. ఆర్జేడీ 65 స్థానాల్లో ముందంజలో ఉంది. జేడీయూ 55, కాంగ్రెస్‌ 26, వామపక్షాలు 17, వీఐపీ 4 స్థానాల్లో ఆధిక్యంలో కొనసాగుతున్నాయి. 

ప్రముఖులు ఇలా.. 

మహాకూటమి ముఖ్యమంత్రి అభ్యర్థి, ఆర్జేడీ నేత తేజస్వీ యాదవ్‌ రాఘోపూర్‌లో ముందంజలో ఉన్నారు. కాంగ్రెస్‌ నేత శతృఘ్న సిన్హా కుమారుడు, ఆ పార్టీ అభ్యర్థి లవ్‌ సిన్హా బాంకిపూర్‌లో వెనుకబడ్డారు. ఇమామీ గంజ్‌లో హెచ్‌ఐఎం నేత జీతన్‌రాం మాంఝీ, హసన్‌పూర్‌లో ఆర్జేడీ నేత తేజ్‌ ప్రతాప్‌ యాదవ్‌, బిహారీగంజ్‌లో కాంగ్రెస్‌ అభ్యర్థి సుభాషిణీ శరద్‌ యాదవ్‌ వెనుకంజలో ఉన్నారు.