బిహార్‌ ఉప ముఖ్యమంత్రికి కరోనా!

పట్నా: బిహార్‌ ఎన్నికలు సమీపిస్తోన్న వేళ, అక్కడ వైరస్‌ వ్యాప్తి పెరుగుతున్నట్లు కనిపిస్తోంది. ఇప్పటికే బిహార్‌లో కరోనా కేసుల సంఖ్య పెరుగుతున్నట్లు నివేదికలు వెల్లడిస్తున్నాయి. తాజాగా రాష్ట్ర ఉపముఖ్యమంత్రి సుశీల్‌ కుమార్‌ మోదీ కూడా వైరస్‌ బారినపడ్డారు. ఈ విషయాన్ని ఆయనే స్వయంగా వెల్లడించారు. అయితే, ప్రస్తుతం శరీరంలోని అన్ని కీలక వ్యవస్థలు సక్రమంగానే పనిచేస్తున్నాయని పేర్కొన్నారు. తొలుత స్వల్ప జ్వరం ప్రారంభమైందని అయితే, గడిచిన రెండు రోజులుగా శరీర ఉష్ణోగ్రతల్లో ఎటువంటి మార్పులు లేవని తెలిపారు. సీటీ స్కాన్‌ రిపోర్టు కూడా సాధారణంగానే ఉందని సుశీల్‌ పేర్కొన్నారు. ప్రస్తుతం పట్నాలోని ఎయిమ్స్‌లో చికిత్స పొందుతున్న సుశీల్ మోదీ,‌ మరికొన్ని రోజుల్లోనే కోలుకొని ఎన్నికల ప్రచారంలో పాల్గొంటాననే ధీమా వ్యక్తం చేశారు.