ఎస్సీలపై దమనకాండకు పెద్దిరెడ్డే కారణం: బాబు

చిత్తూరు: చిత్తూరులో తెదేపా నేతల గృహ నిర్భందాన్ని ఆ పార్టీ అధినేత చంద్రబాబు ఖండించారు. తెదేపా నేతలు ఒత్తిడి చేయడం వల్లే ప్రతాప్‌ మృతదేహానికి పోస్టుమార్టం నిర్వహించారన్నారు. పార్టీ ఎస్సీ నాయకులతో ఆయన ఇవాళ టెలీకాన్ఫరెన్స్‌ నిర్వహించారు. మృతుడి సెల్‌ఫోన్‌ లాగేస్కోవడం, శవపరీక్ష జరపడం, హడావుడిగా అంత్యక్రియలు నిర్వహించడాన్ని తప్పుబట్టారు. ఈ కేసులో కీలకమైన మృతుడి కాల్‌లిస్టును బయటపెట్టాలని చంద్రబాబు డిమాండ్‌ చేశారు. చౌటుపల్లిలో మరో ఎస్సీ యువకుడి ప్రాణాలు తీసి ట్రాక్టర్‌ బోల్తాపడి మరణించినట్లుగా చిత్రీకరించారని చంద్రబాబు అన్నారు. చిత్తూరులో దళితులపై దమనకాండకు మంత్రిపెద్దిరెడ్డి రామచంద్రారెడ్డి అరాచకాలే కారణమని అన్నారు. మూడు నెలల్లో రెండు శిరోముండనం ఘటనలు మానవత్వానికే సిగ్గు చేటని విమర్శించారు. ఈ ఘటనలకు ముఖ్యమంత్రి జగన్‌ బాధ్యత వహించాలని చంద్రబాబు డిమాండ్‌ చేశారు.