కార్పొరేట్‌ ఆసుపత్రులను నియంత్రించాలి: చాడ

హైదరాబాద్‌: కొవిడ్‌ చికిత్స పేరిట భారీగా వసూళ్లకు పాల్పడుతున్న కార్పొరేట్‌ ఆసుపత్రులను నియంత్రించాలని సీపీఐ రాష్ట్ర కార్యదర్శి చాడ వెంకట్‌ రెడ్డి ప్రభుత్వాన్ని డిమాండ్‌ చేశారు. అడ్డగోలు దోపిడీకి పాల్పడుతున్న ప్రైవేటు దవాఖానాలపై నిఘా పెట్టి కఠిన చర్యలు తీసుకోవాలని కోరారు. శుక్రవారం మీడియాతో చాడ మాట్లాడుతూ... రాష్ట్రంలో రోజు రోజుకూ కరోనా పాజిటివ్‌ కేసులు పెరిగిపోతుండటంతో ప్రజలు భయాందోళనకు గురవుతున్నారని అన్నారు. అదేవిధంగా ఉస్మానియా ఆసుపత్రిలో నాలుగు నెలలుగా వేతనాలు ఇవ్వకపోవడంతో అవుట్‌ సోర్సింగ్‌ నర్సులు ఆందోళన చేస్తున్నారని.. ఈ విషయంలో ముఖ్యమంత్రి కేసీఆర్‌ జోక్యం చేసుకోవాలని చాడ డిమాండ్‌ చేశారు.