కమల్‌నాథ్‌కు ఈసీ షాక్‌

దిల్లీ: కాంగ్రెస్‌ సీనియర్‌ నేత, మధ్యప్రదేశ్‌ మాజీ ముఖ్యమంత్రికి కేంద్ర ఎన్నికల సంఘం షాకిచ్చింది. ఉప ఎన్నికల ప్రచారంలో స్టార్‌ క్యాంపెయినర్‌ జాబితా నుంచి ఆయన్ను తప్పించింది. ప్రచారంలో వివాదాస్పద వ్యాఖ్యలతో ఎన్నికల ప్రవర్తనా నియమావళిని పదే పదే ఉల్లంఘిస్తున్నారని, తమ హెచ్చరికలను సైతం విస్మరించారని మండిపడింది. మధ్యప్రదేశ్‌లో జరుగుతున్న ఈ ఉప ఎన్నికల ప్రచారంలో స్టార్‌ క్యాంపెయినర్‌గా ఆయన్ను అనుమతించొద్దని అధికారులను ఆదేశించింది. ఇకపై ఆయన ఏ నియోజకవర్గంలోనైనా ప్రచారానికి వెళ్తే కమల్‌నాథ్‌ ప్రయాణ ఖర్చులు, వసతి తదితర ఖర్చులన్నీ సంబంధిత అభ్యర్థులే భరించాలని ఆదేశించింది.

ఇటీవల ఉప ఎన్నికల ప్రచారం సందర్భంగా భాజపా మహిళా అభ్యర్థిని అభ్యంతరక పదంతో సంబోధించడం వివాదానికి దారితీసింది. దీనిపై ఈసీ ఆయన్ను హెచ్చరించిన విషయం తెలిసిందే. ఈ ఏడాది మార్చిలో మధ్యప్రదేశ్‌లో జ్యోతిరాదిత్య సింథియా తిరుగుబావుటా ఎగరవేయడంతో కమల్‌నాథ్‌ నేతృత్వంలోని కాంగ్రెస్‌ ప్రభుత్వం కూలిపోయింది. తన మద్దతుదారులైన ఎమ్మెల్యేలతో సింథియా కలిసి కమలదళంలో చేరారు. దీంతో మధ్యప్రదేశ్‌లో 28 అసెంబ్లీ స్థానాలకు ఉప ఎన్నికలు జరుగుతున్నాయి.