గోరటి వెంకన్నకు ఎమ్మెల్సీ

గవర్నర్‌ కోటా ఎమ్మెల్సీ అభ్యర్థులు ఖరారు

హైదరాబాద్: తెలంగాణ శాసనమండలిలో రాష్ట్ర గవర్నర్‌ కోటాలో ఖాళీ అయిన మూడు ఎమ్మెల్సీ స్థానాలను భర్తీ చేయాలని కేబినెట్‌ నిర్ణయించింది. గవర్నర్‌ కోటా కింద ఖాళీ అయిన మూడు స్థానాలకు ప్రముఖ ప్రజా గాయకుడు గోరటి వెంకన్న, మాజీ మంత్రి బస్వరాజు సారయ్య, బోగారపు దయానంద్‌ పేర్లను ఖరారు చేసింది. సీఎం కేసీఆర్‌ అధ్యక్షతన జరిగిన మంత్రివర్గ సమావేశంలో ఈ కీలక నిర్ణయం తీసుకున్నారు. ముగ్గురు పేర్లతో ఖరారు చేసిన జాబితాను ప్రభుత్వం గవర్నర్‌ ఆమోదానికి పంపింది. గవర్నర్‌ ఆమోదం అనంతరం వారితో ఎమ్మెల్సీలుగా ప్రమాణస్వీకారం చేయించనున్నారు. మరోవైపు ఎమ్మెల్సీలుగా ఖరారైన గోరటి వెంకన్న, బస్వరాజు సారయ్య, బోగారపు దయానంద్‌ సీఎం కేసీఆర్‌ను కలిశారు. తమను ఎమ్మెల్సీలుగా ఎంపిక చేసినందుకు కృతజ్ఞతలు తెలిపారు. ఈ సందర్భంగా సీఎం వారికి అభినందనలు తెలిపి శాలువాతో సత్కరించారు.