ఎవర్ని ఎంపిక చేసినా కలిసి పనిచేస్తాం:జగ్గారెడ్డి

హైదరాబాద్‌: టీపీసీసీ నూతన అధ్యక్షుడిగా అందరికీ ఆమోదయోగ్యమైన నాయకుడే ఉంటారని సంగారెడ్డి ఎమ్మెల్యే జగ్గారెడ్డి అన్నారు. కాంగ్రెస్‌ అధినేత్రి సోనియాగాంధీ ఎవర్ని ఎంపిక చేసినా అంతా కలిసి పనిచేస్తామని చెప్పారు. సీఎల్పీ కార్యాలయంలో మీడియాతో ఆయన చిట్‌చాట్‌ నిర్వహించారు. పీసీసీ అధ్యక్షుడి ఎంపిక విషయంపై చర్చించేందుకు సోనియా, రాహుల్‌ గాంధీలను కలిసేందుకు ప్రయత్నిస్తు్న్నామని.. అనుమతి రాగానే దిల్లీ వెళ్తామని చెప్పారు. ప్రత్యేక తెలంగాణ ఏర్పడిన తర్వాత రాజకీయాల్లో డబ్బు ప్రభావం ఎక్కువైందన్నారు. ఓటు, డబ్బు అనే నినాదాన్ని తెరాస తెచ్చిందని.. సిద్ధాంతాలను నమ్మే పార్టీ అని చెప్పుకొనే భాజపా కూడా గ్రేటర్‌ ఎన్నికల్లో డబ్బు రాజకీయం చేసిందని జగ్గారెడ్డి ఆరోపించారు. డబ్బులిచ్చి ఓట్లు వేయించుకునే పరిస్థితి కాంగ్రెస్‌కు లేదన్నారు. అందుకే ఎన్నికల్లో ఓడిపోతూ వస్తున్నామని చెప్పారు. కాంగ్రెస్‌లో ఆర్థిక పరిపుష్ఠి కలిగిన నేతలు ఎంతోమంది ఉన్నారని చెప్పారు. పీసీసీ అధ్యక్ష ఎన్నిక తర్వాత ఆర్థికబలంతో కాంగ్రెస్‌ ఎన్నికలు వెళ్తుందని ఆయన వ్యాఖ్యానించారు.