అవసరమైతే చిరాగ్ సహకారం : తేజస్వి

ఆ వార్తలను కొట్టిపారేసిన ఎల్‌జేపీ

పట్నా: ఎన్నికల ఫలితాలు వచ్చిన తరవాత అవసరమైతే తాము చిరాగ్ పాసవాన్ సహకారం తీసుకుంటామని ఆర్జేడీ నేత తేజస్వీ యాదవ్ అన్నారు. లోక్‌జనశక్తి పార్టీ (ఎల్‌జేపీ) రాష్ట్ర అధ్యక్షుడు, ఎంపీ ప్రిన్స్‌ రాజ్ మంగళవారం ఆర్జేడీ నాయకురాలు రబ్రీదేవీ నివాసానికి వెళ్లిన నేపథ్యంలో తేజస్వి వ్యాఖ్యలు ప్రాధాన్యం సంతరించుకున్నాయి. 

‘ఎన్నికల ఫలితాల తరవాత మెజార్టీ కొరవడితే, ఆర్జేడీ చిరాగ్‌ పాసవాన్‌ పార్టీ అయిన ఎల్‌జేపీ సహకారం తీసుకోవచ్చు’ అని తేజస్వి వ్యాఖ్యానించారు. ఈ ఊహాగానాలను ఎల్‌జేపీ తోసిపుచ్చింది. దివంగత నేత రాంవిలాస్ పాసవాన్‌కు నివాళులు అర్పించే కార్యక్రమానికి ఆహ్వానించేందుకు మాత్రమే ఎల్‌జేపీ నేత అక్కడికి వెళ్లారని, దానికి రాజకీయాలతో ఎలాంటి సంబంధం లేదని కొట్టిపారేసింది.

భారతీయ జనతా పార్టీ నేతృత్వంలోని కూటమి నుంచి వైదొలిగి, బిహార్ అసెంబ్లీ ఎన్నికల్లో ఒంటరిగా బరిలోకి దిగుతున్నట్లు ఇదివరకే చిరాగ్ ప్రకటించిన సంగతి తెలిసిందే. కాగా, మూడు దశల్లో జరగనున్న అసెంబ్లీ ఎన్నికలు అక్టోబర్‌ 28 నుంచి ప్రారంభం కానున్నాయి. నవంబర్‌ 10న ఫలితాలు వెల్లడికానున్నాయి.