ప్రజాస్వామ్యం కోసం గళమెత్తండి: రాహుల్‌

దిల్లీ: రాజస్థాన్‌లో రాజకీయ అనిశ్చితికి భాజపానే కారణమని కాంగ్రెస్‌ పార్టీ అరోపిస్తోంది. అధికారంలో ఉన్న పార్టీని కూలదోసి, ప్రజాస్వామ్యాన్ని అపహాస్యం చేయాలని చూస్తోందని ఆ పార్టీ విమర్శిస్తోంది. ఈ నేపథ్యంలో ప్రజాస్వామ్య పరిరక్షణకు ప్రతి ఒక్కరూ గళమెత్తాలని ఆ పార్టీ అగ్రనేత రాహుల్‌ గాంధీ ప్రజలకు పిలుపునిచ్చారు. ఈ మేరకు ఆదివారం ఆయన ఓ వీడియో ట్విటర్‌లో పోస్ట్‌ చేశారు.

దేశమంతా కరోనాపై పోరాడుతుంటే.. భాజపా ప్రజాస్వామ్యాన్ని కాలరాసి ప్రభుత్వాలను కూల్చేందుకు ప్రయత్నిస్తోందని ఆరోపించారు. మధ్యప్రదేశ్‌లో అదే చేశారు.. ఇప్పుడు రాజస్థాన్‌లో అదే చేస్తున్నారని విమర్శించారు. రాజస్థాన్‌ అసెంబ్లీని తక్షణమే సమావేశ పరచాలని డిమాండ్‌ చేశారు. ఈ మేరకు #SpeakUpForDemocracy పేరిట హ్యాష్‌ట్యాగ్‌  ఏర్పాటు చేసి.. ఈ పోరులో భాగస్వాములు అవ్వాలని ప్రజలకు పిలుపునిచ్చారు. మరోవైపు రాష్ట్రపతి భవన్‌ ఎదుట ఆందోళన చేయాలని ఆ పార్టీ భావిస్తోంది. రాజస్థాన్‌ అంశంపై దేశవ్యాప్త ఆందోళనలకూ సిద్ధమవుతోంది.