మోదీ, అమిత్‌షా జోక్యం చేసుకోవాలి: జయదేవ్‌

దిల్లీ: ఏపీలోని దేవాలయాలపై దాడుల వ్యవహారంలో ప్రధాని మోదీ, కేంద్ర హోంమంత్రి అమిత్‌షా జోక్యం చేసుకోవాలని తెదేపా ఎంపీ గల్లా జయదేవ్‌ కోరారు. లోక్‌సభలో ఆయన మాట్లాడుతూ దేవాలయాలపై దాడుల అంశాన్ని ప్రస్తావించారు. ‘‘ఏపీలో రెండు ప్రముఖ దేవాలయాల్లోని రథాలను తగులబెట్టారని చెప్పడానికే చాలా బాధపడుతున్నాను. ఆరు దశాబ్దాల చరిత్ర కలిగిన అంతర్వేది శ్రీలక్ష్మీనరసింహస్వామి రథాన్ని ఈనెల 7న.. నెల్లూరు జిల్లాలోని ప్రసన్న వేంకటేశ్వరస్వామి రథానికి ఈ ఏడాది ఫిబ్రవరి 14న నిప్పు పెట్టారు. తూర్పుగోదావరి జిల్లా పిఠాపురంలో ఆరు ఆలయాల్లోని 23 దేవతామూర్తుల విగ్రహాలను ఒక్కరోజులోనే ధ్వంసం చేశారు. ఈ ఘటనలపై ఇప్పటికి కనీసం కేసూ నమోదవలేదు.. ఎవర్నీ అరెస్టూ చేయలేదు. ఇంతకుముందు ఆస్తుల వేలం నిర్ణయం తీసుకున్న తితిదే.. ఆఖరికి వెనక్కి తగ్గక తప్పలేదు. ఆలయాలు, హిందువుల మనోభావాలపై ఈ రకమైన దాడులు ఏమాత్రం ఆమోదయోగ్యం కాదు. ఈ ఘటనల్లో తక్షణమే జోక్యం చేసుకుని హిందువులకు న్యాయం చేయాలని ప్రధాని, కేంద్ర హోంమంత్రిని కోరుతున్నా’ అని గల్లా జయదేవ్‌ విజ్ఞప్తి చేశారు.