తెలంగాణ శాసనసభ సమావేశాలు కుదింపు?

హైదరాబాద్‌: తెలంగాణ శాసనసభ వర్షాకాల సమావేశాలు కుదించే సూచనలు స్పష్టంగా కనిపిస్తున్నాయి. కరోనా కేసుల సంఖ్య పెరుగుతున్న నేపథ్యంలో సమావేశాలను కుదించాలన్న ప్రతిపాదన వచ్చింది. సోమవారం నాంపల్లి ఎమ్మెల్యే సహా అధికారులు, సిబ్బంది కలిపి సుమారు 52 మంది కరోనా పాజిటివ్‌ నిర్ధారణ అయింది. ఈ క్రమంలో శాసనసభాపక్ష నేతలతో స్పీకర్‌ పోచారం శ్రీనివాస్‌రెడ్డి సమావేశమయ్యారు. సమావేశాల కుదింపు విషయంపై చర్చించారు. కేసులు పెరుగుతున్న దృష్ట్యా రేపటితో సమావేశాలను ముగించాలని రాష్ట్ర ప్రభుత్వం ప్రతిపాదించగా.. మరికొన్నాళ్లు కొనసాగించాలని కాంగ్రెస్‌ శాసనసభాపక్షం కోరింది. కృష్ణా జలాలు సహా పలు కీలక అంశాలపై చర్చ జరగాల్సి ఉన్నందున సమావేశాలు కొనసాగించాలని స్పీకర్‌కు విజ్ఞప్తి చేసింది. గ్రేటర్‌ హైదరాబాద్‌ సమస్యలపై చర్చించాలని మజ్లిస్‌ కోరింది. దీనిపై స్పీకర్‌ పోచారం రేపు నిర్ణయాన్ని వెల్లడించే అవకాశముంది.