సీఎం జగన్‌ వైఖరి మార్చుకోవాలి: వర్ల

అమరావతి: గుంటూరులో రైతులకు సంకెళ్లు వేసి తీసుకెళ్లిన ఘటనపై తెలుగుదేశం పార్టీ (తెదేపా) సీనియర్‌ నేత వర్ల రామయ్య ఆగ్రహం వ్యక్తం చేశారు. ఈ మేరకు రైతుల చేతులకు సంకెళ్లు వేసిన దృశ్యాలను జతపరుస్తూ జాతీయ మానవ హక్కుల కమిషన్‌కు ఆయన లేఖ రాశారు. కరుడగట్టిన నేరస్థులు, దేశ భద్రతకు భంగం కలిగించే వారికి వేసినట్లుగా అమరావతి రైతులకు సంకెళ్లు వేయడం అత్యంత దారుణమన్నారు. రాష్ట్ర ప్రభుత్వ రైతు వ్యతిరేక ధోరణికి ఈ సంఘటనే ప్రత్యక్ష ఉదాహరణ అని అన్నారు. రాష్ట్ర ముఖ్యమంత్రి వైఎస్‌ జగన్‌ మోహన్‌ రెడ్డి ఇప్పటికైనా రైతుల పట్ల తన వైఖరిని మార్చుకోవాలని హితవు పలికారు. సుప్రీంకోర్టు ఆదేశాలను పెడచెవిన పెట్టి రైతులకు సంకెళ్లు వేసి తీసుకెళ్లడం న్యాయవ్యవస్థను ధిక్కరించడమే అవుతుందని లేఖలో పేర్కొన్నారు. జాతీయ మానవ హక్కుల కమిషన్‌ వెంటనే స్పందించి ఈ విషయంలో సరైన చర్యలు తీసుకోవాలని వర్ల కోరారు.