Aaditya Thackeray: ‘ఈ ద్రోహాన్ని మర్చిపోలేం.. ఇది నిజం, అబద్ధం మధ్య పోరు’

ముంబయి: మహారాష్ట్రలో (Maharashtra) రాజకీయ సంక్షోభం కొనసాగుతోంది. ఏక్‌నాథ్ శిందే (Eknath Shinde) వర్గం తిరుగుబాటు చేయడంతో శివసేన రెండు వర్గాలుగా విడిపోయింది. ఈ నేపథ్యంలోనే మంత్రి, సీఎం ఉద్ధవ్‌ ఠాక్రే కుమారుడు ఆదిత్య ఠాక్రే (Aaditya Thackeray) రెబల్‌ అభ్యర్థులపై ఘాటు వ్యాఖ్యలు చేశారు. ఇది నిజం, అబద్ధం మధ్య సాగుతోన్న పోరు అని.. ఈ ద్రోహాన్ని మర్చిపోలేనని పేర్కొన్నారు.

ఉద్ధవ్ ఠాక్రే (Uddhav Thackeray) నేతృత్వంలో పార్టీ కార్యాలయంలో జరిగిన సమావేశం అనంతరం ఆదిత్య ఠాక్రే మాట్లాడారు. తమ పార్టీనే గెలుస్తుందని ధీమా వ్యక్తం చేశారు. ‘రెబల్‌ ఎమ్మెల్యేలు చేసిన ఈ ద్రోహాన్ని మర్చిపోలేము. తిరుగుబాటుదారులను సహించేది లేదు. ఇది నిజం, అబద్ధం మధ్య సాగుతున్న సమరం. కచ్చితంగా శివసేననే గెలుస్తుంది’ అని వ్యాఖ్యానించారు.

ఇదిలా ఉంటే.. అసమ్మతి నేతలు శివసేన వ్యవస్థాపకుడు బాలాసాహెబ్ ఠాక్రే పేరును ఉపయోగించకుండా ఆపాలని ఆ పార్టీ జాతీయ కార్యవర్గం శనివారం సమావేశాన్ని ఏర్పాటు చేసి తీర్మానాన్ని ప్రవేశపెట్టింది. కాగా దానికి ఆమోదం లభించింది. దీంతో బాలాసాహెబ్, శివసేన పేర్లను ఏ వర్గం ఉపయోగించకుండా చూడాలంటూ ఉద్ధవ్ వర్గం ఎన్నికల సంఘాన్ని ఆశ్రయించింది. ఏక్‌నాథ్‌ శిందే వర్గం కొత్త పార్టీ స్థాపించనుందని, దానికి ‘శివసేన బాలాసాహెబ్ ఠాక్రే’ అని పేరు పెట్టనున్నట్లు వార్తలు గుప్పుమంటున్నాయి. ఈ క్రమంలో ఉద్ధవ్ వర్గం ఈసీని ఆశ్రయించింది.