ఆప్‌ ఎమ్మెల్యేకు రెండేళ్లు జైలు శిక్ష 

దిల్లీ: ఆప్‌ ఎమ్మెల్యే సోమనాథ్‌ భారతికి దిల్లీ కోర్టు రెండేళ్ల పాటు జైలు శిక్ష విధించింది. 2016లో ఎయిమ్స్‌ భద్రతా సిబ్బందిపై దాడి కేసులో అదనపు చీఫ్‌ మెట్రోపాలిటన్‌ మెజిస్ట్రేట్‌ ఆయనకు జైలు శిక్షతో పాటు రూ.లక్ష జరిమానా కూడా విధించారు. అయితే, ఈ తీర్పునకు వ్యతిరేకంగా హైకోర్టులో అప్పీల్‌ చేసుకొనేందుకు వీలుగా ఆయనకు బెయిల్‌ మంజూరైంది. 

2016 సెప్టెంబర్‌ 9న సోమనాథ్‌ భారతితో పాటు దాదాపు 300 మంది ఎయిమ్స్‌ వద్ద సరిహద్దు గోడను జేసీబీతో పడగొట్టేందుకు ప్రయత్నించారని, ఈ క్రమంలో భద్రతా సిబ్బందిపై దాడి చేశారని ఆరోపిస్తూ కేసు నమోదైంది. ఎయిమ్స్‌ చీఫ్‌ సెక్యూరిటీ అధికారి ఆర్‌ఎస్‌ రావత్‌ ఇచ్చిన ఫిర్యాదు ఆధారంగా పోలీసులు కేసు నమోదు చేశారు. ఈ వ్యవహారంలో నేరం రుజువు కావడంతో శిక్ష ఖరారు చేసినట్టు న్యాయస్థానం పేర్కొంది. సోమ్‌నాథ్‌ భారతితో పాటు ఈ కేసులో సహ నిందితులుగా ఉన్న ఆయన సన్నిహితులు జగత్‌ సైనీ, దిలీప్‌ ఝా, సందీప్‌ సోనూ, రాకేశ్‌ పాండేకు వ్యతిరేకంగా ఆధారాలు లభ్యంకాకపోవడంతో వారిని నిర్దోషులుగా ప్రకటించింది. 

ఇదీ చదవండి..

మీ గ్రామంలో పంచాయతీ ఎన్నికలు ఎప్పుడంటే?