Andhra News: తెదేపా ఎమ్మెల్సీ అశోక్‌బాబుకు బెయిల్‌ మంజూరు

విజయవాడ: తెలుగుదేశం పార్టీ కార్యాలయ కార్యదర్శి, ఎమ్మెల్సీ అశోక్‌బాబుకు బెయిల్‌ మంజూరు అయింది. రూ.20 వేల పూచికత్తుతో సీఐడీ కోర్టు ఆయనకు బెయిల్‌ మంజూరు చేసింది. ప్రభుత్వ సర్వీసులో ఉండగా పదోన్నతి విషయంలో విద్యార్హతను తప్పుగా చూపించారన్న ఆరోపణలపై అశోక్‌బాబును సీఐడీ పోలీసులు గురువారం అర్ధరాత్రి అరెస్టు చేసిన విషయం తెలిసిందే. గురువారం రాత్రి నుంచి దాదాపు 17 గంటలపాటు అశోక్‌బాబును గుంటూరులోని సీఐడీ కార్యాలయంలోని ఉంచి విచారించారు. అనంతరం కొవిడ్‌ పరీక్ష నిర్వహించి నెగిటివ్‌ రావడంతో ఆయన్ను న్యాయమూర్తి ఎదుట హాజరుపర్చారు. తెదేపా శ్రేణుల ఆందోళనల నేపథ్యంలో జడ్జి నివాసం వద్ద భారీగా పోలీసు బందోబస్తు ఏర్పాటుచేశారు. విచారణ చేపట్టిన న్యాయమూర్తి అశోక్‌బాబుకు బెయిల్‌ మంజూరు చేశారు.