Andhra News: చంద్రబాబు, నారాయణ సహా పలువురిపై ఏపీ సీఐడీ కేసులు

అమరావతి: రాజధాని అమరావతి మాస్టర్‌ ప్లాన్‌, ఇన్నర్‌ రింగ్‌రోడ్డు డిజైన్‌లో అక్రమాలపై మంగళగిరి ఎమ్మెల్యే ఆళ్ల రామకృష్ణారెడ్డి (ఆర్కే) చేసిన ఫిర్యాదుపై ఏపీ సీఐడీ పోలీసులు పలువురిపై కేసులు నమోదు చేశారు. ఇన్నర్‌ రింగ్‌రోడ్డులో అవకతవకలు జరిగాయంటూ గత నెల 27న ఆర్కే ఫిర్యాదు చేశారు. ఈనెల 6న విచారణ చేపట్టిన పోలీసులు.. అవకతవకలు జరిగినట్లు ప్రాథమికంగా నిర్ధారించినట్లు ఎఫ్‌ఐఆర్‌లో పేర్కొన్నారు. 

దీనిపై ఆదివారం కేసు నమోదు చేసినట్లు సీఐడీ పోలీసులు తెలిపారు. మాజీ సీఎం, తెదేపా అధినేత చంద్రబాబు, మాజీ మంత్రి నారాయణ, లింగమనేని రమేశ్‌, లింగమనేని వెంకట సూర్యరాజశేఖర్‌, ఎల్‌ఈపీఎల్‌ ప్రాజెక్ట్స్‌, రామకృష్ణ హౌసింగ్‌ ప్రైవేట్‌ లిమిటెడ్‌ డైరెక్టర్‌ అంజనీకుమార్‌పై సీఐడీ కేసు నమోదు చేసినట్లు ఎఫ్‌ఐఆర్‌లో పేర్కొన్నారు. వారిపై ఐపీసీ సెక్షన్‌ 120బి, 420, 34, 35, 36, 37, 166, 167, 217 సెక్షన్లతో పాటు అవినీతి నిరోధక చట్టం సెక్షన్‌ 13(2) రెడ్‌ విత్‌ 13 (1ఏ) కింద కేసు నమోదు చేశారు.