Andhra news: విశాఖ రాజధానిగా వ్యతిరేకించే వారిని ఉత్తరాంధ్రలో తిరగనివ్వొద్దు: మంత్రి అప్పలరాజు

విశాఖపట్నం: విశాఖను పరిపాలన రాజధానిగా చేయాలనే ముఖ్యమంత్రి జగన్‌ నిర్ణయాన్ని వ్యతిరేకించిన ఏ ఒక్క నాయకుడిని ఉత్తరాంధ్రలో తిరగనివ్వవద్దని రాష్ట్ర పశుసంవర్థక, మత్స్యశాఖ మంత్రి సిదిరి అప్పలరాజు అన్నారు. విశాఖ ఫిషింగ్‌ హార్బర్‌లో రూ.2.75 కోట్లతో నిర్మించిన ఆధునిక చేపల మార్కెట్‌ను మంత్రి ప్రారంభించారు. ఈ సందర్భంగా ఏర్పాటు చేసిన సమావేశంలో ఆయన మాట్లాడుతూ... సుస్థిరమైన పాలన కావాలంటే మళ్లీ ముఖ్యమంత్రిగా జగన్‌ను ఎన్నుకోవాలని ప్రజలకు విజ్ఞప్తి చేశారు. ‘‘ముఖ్యమంత్రిగా చేసినప్పుడు చంద్రబాబుకు ఉత్తరాంధ్ర గుర్తులేదు. విశాఖ గుర్తుకు రాలేదు. ఎన్నికలు ఉన్నాయి కాబట్టీ ఉత్తరాంధ్ర కావాలి.. రాజకీయాలు చేయాలి. అందరం ఒక్కమాటపై నిలబడి విశాఖను రాజధానిగా వ్యతిరేకించే వారిని ఈ ప్రాంతంలో అడుగు పెట్టనివ్వకూడదు. 2024లో రాబోయే ఎన్నికలకు చంద్రబాబు చేసే మోసపూరిత వాగ్దానాలను నమ్మవద్దు’’ అని మంత్రి అప్పలరాజు  ప్రజలకు సూచించారు.