Atchannaidu: రాయితీలు ఎత్తివేసి.. జేట్యాక్స్‌తో దోచుకుంటున్నారు: అచ్చెన్నాయుడు

అమరావతి: ఆక్వా రైతులను ఆదుకోవాల్సిన ముఖ్యమంత్రి జగన్‌.. ప్రశ్నించిన తెదేపా నేతలపై అక్రమ కేసులు పెట్టి ఇబ్బందులకు గురిచేయడం సరైన పద్ధతి కాదని ఆ పార్టీ రాష్ట్ర అధ్యక్షుడు అచ్చెన్నాయుడు మండిపడ్డారు. పశ్చిమ గోదావరి జిల్లా ఉండిలో తెదేపా నేతలపై నమోదు చేసిన అక్రమ కేసులను తక్షణమే ఉపసంహరించుకోవాలని డిమాండ్‌ చేశారు. ఈ మేరకు అచ్చెన్న ప్రకటన విడుదల చేశారు. తెదేపా అధినేత చంద్రబాబు హయాంలో రాష్ట్రంలో అగ్రభాగాన ఉన్న ఆక్వారంగం నేడు పతనమైందన్నారు. మద్దతు ధర లభించక ఆక్వా రైతులు ఆత్మహత్యలకు పాల్పడుతున్నారన్నారని ఆవేదన వ్యక్తం చేశారు. షరతుల పేరుతో రాయితీలు ఎత్తివేసి, జేట్యాక్స్ తో ఆక్వా రైతులను దోచుకుంటున్నారని ఆరోపించారు. ప్రశ్నించిన వారిని అణచివేయాలనే జగన్ రెడ్డి తీరు.. ఇకపై సాగనివ్వబోమని హెచ్చరించారు.