Atchannaidu: జగన్‌ను మించిన నియంతలా పెద్దారెడ్డి: అచ్చెన్నాయుడు

అమరావతి: తాడిపత్రిలో తమ పార్టీ కౌన్సిలర్ విజయ్ కుమార్‌పై వైకాపా గూండాల దాడి హేయమని తెదేపా రాష్ట్ర అధ్యక్షుడు అచ్చెన్నాయుడు అన్నారు. విజయ్‌కుమార్‌పై వైకాపాకు చెందిన నలుగురు వ్యక్తులు కర్రలతో దాడికి పాల్పడ్డారని.. రెండు రోజుల క్రితం మరో కౌన్సిలర్‌ మల్లికార్జున పైనా దాడి చేశారని ఆరోపంచారు. దళితులపై సీఎం జగన్‌ కక్ష కట్టారని అచ్చెన్న మండిపడ్డారు. రాష్ట్రంలో ‘వైఎస్సార్‌ దళితులపై దాడులు కానుక’ పథకం అమలవుతోందని ఆయన ఎద్దేవా చేశారు. తాడిపత్రిలో ఎమ్మెల్యే పెద్దారెడ్డి ఆగడాలకు అంతులేకుండా పోతోందని.. జగన్‌ను మించిన నియంతలా ఆయన వ్యవహరిస్తున్నారన్నారు. తెదేపా కౌన్సిలర్లపై దాడికి పాల్పడిన వారిని వెంటనే అరెస్ట్‌ చేయాలని అచ్చెన్న డిమాండ్‌ చేశారు.

తాడిపత్రి పీఎస్‌ ఎదుట జేసీ ప్రభాకర్‌రెడ్డి బైఠాయింపు

తెదేపా కౌన్సిలర్లపై దాడిని నిరసిస్తూ మాజీ ఎమ్మెల్యే జేసీ ప్రభాకర్‌రెడ్డి ఆందోళనకు దిగారు. తాడిపత్రి పీఎస్‌ ఎదుట ఆయన భైఠాయించారు. తెదేపా నేతలపై వైకాపా కార్యకర్తలు దాడులకు పాల్పడుతున్నా పోలీసులు పట్టించుకోవడం లేదని ఆరోపించారు. జేసీ బైఠాయింపు నేపథ్యంలో ఆయనకు మద్దతుగా పెద్ద ఎత్తున తెదేపా కార్యకర్తలు అక్కడికి చేరుకున్నారు. పోలీసులకు వ్యతిరేకంగా వారంతా నినాదాలు చేశారు.