Atchannaidu: రూ.34వేల కోట్ల బీసీ నిధులు దారి మళ్లించారు: అచ్చెన్నాయుడు

అమరావతి: ముఖ్యమంత్రి జగన్‌మోహన్‌రెడ్డిపై ఏపీ తెదేపా అధ్యక్షుడు అచ్చెన్నాయుడు విమర్శలు గుప్పించారు. రూ.34 వేల కోట్ల బీసీ నిధులు దారి మళ్లించారని ఆరోపించారు. స్థానిక సంస్థల్లో బీసీలకు 10శాతం రిజర్వేషన్లు కోత కోశారని మండిపడ్డారు. జగన్‌ తన నిర్ణయాలతో సుమారు 16 వేల పదవులకు బీసీలకు దూరం చేశారన్నారు. బీసీల నుంచి 8వేల ఎకరాల అసైన్డ్‌ భూములను లాక్కున్నారని ఆరోపించారు. 26 మంది బీసీ నేతలను వైకాపా నేతలు హత్య చేశారని, మరో 650మందిపై తప్పుడు కేసులు పెట్టారని దుయ్యబట్టారు. ఆదరణ పథకం, బీసీలకు విదేశీ విద్య, వివాహ కానుకలు రద్దు చేశారని అచ్చెన్నాయుడు విమర్శించారు.