ts News: ప్రధాని మోదీ ఫోన్‌ చేసి చెప్పారు.. తగ్గేదేలే..: బండి సంజయ్‌

మహబూబ్‌నగర్‌: ఎన్ని కూటములు కట్టినా సీఎం కేసీఆర్‌ జైలుకు వెళ్లక తప్పదని భాజపా తెలంగాణ రాష్ట్ర అధ్యక్షుడు బండి సంజయ్‌ అన్నారు. 317 జీవోకు నిరసనగా భాజపా ఆధ్వర్యంలో మహబూబ్‌నగర్‌లో ఏర్పాటు చేసిన సభలో బండి సంజయ్‌ పాల్గొని ప్రసంగించారు. 317 జీవోను సవరించే వరకు భాజపా పోరాటం కొనసాగుతుందని స్పష్టం చేశారు. కేసీఆర్‌, కుటుంబం అవినీతిపై విచారణలు జరుగుతాయని పేర్కొన్నారు. విచారణల భయం వల్లే జాతీయ కూటమి అంటూ కొత్త నాటకాలు ఆడుతున్నారని ధ్వజమెత్తారు. గడీల పాలన నుంచి తెలంగాణకు విముక్తి కల్పించడమే భాజపా లక్ష్యమన్నారు. పోరాటంలో వెనక్కి తగ్గవద్దని ప్రధాని మోదీ ఫోన్‌ చేసి చెప్పారని తెలిపారు. కొవిడ్‌ కంటే అతి ప్రమాదకరమైన వైరస్‌ కేసీఆర్‌ అని బండి సంజయ్‌ ఆరోపించారు. భాజపా నేతలు మురళీధర్‌రావు, జితేందర్‌రెడ్డి, డీకే అరుణ, ఈటల రాజేందర్‌ తదితరులు సభలో పాల్గొన్నారు.