TS News: నిబంధ‌న‌లు పాటించినా కేసులా?: విజయశాంతి

హైద‌రాబాద్‌: సిద్దిపేట‌లో ప్ర‌జాస్వామ్యం ఉందా లేక నిరంకుశ రాజ్యం న‌డుస్తోందా అర్థం కావ‌డం లేద‌ని మాజీ ఎంపీ, భాజ‌పా నేత విజ‌య‌శాంతి విమ‌ర్శించారు. స‌ర్కారు ఆస్ప‌త్రుల్లో ప‌రిస్థితుల‌ను ప‌రిశీలించ‌డానికి వెళ్లిన భాజపా మ‌హిళా మోర్చా నాయ‌కుల‌పై నాన్ బెయిల‌బుల్ కేసులు పెడ‌తారా అని ప్ర‌శ్నించారు. ఈ మేరకు ఆమె ఓ ప్రకటన విడుదల చేశారు.

 కొవిడ్ నిబంధ‌న‌ల‌కు లోబ‌డి పీపీఈ కిట్లు వేసుకొని ఆస్ప‌త్రుల‌కు వెళ్లినా.. డిజాస్ట‌ర్ మేనేజ్‌మెంట్ యాక్ట్ కింద కేసులు పెట్ట‌డం ఏంట‌ని విజయశాంతి నిలదీశారు. నిత్యం లాక్‌డౌన్‌ను ఉల్లంఘిస్తున్న ఎంత‌మందిపై కేసులు పెట్టి కోర్టు ముందు ప్ర‌వేశ పెడుతున్నారో చెప్పాల‌ని ప్రశ్నించారు. పీపీఈ కిట్ ధ‌రించ‌కుండా గాంధీ, ఎంజీఎంలో తిరిగిన సీఎం కేసీఆర్‌పై కేసు పెట్టాల‌ని ఆమె వ్యాఖ్యానించారు.