Telangana News: ఇక్కడి రైతులను గాలికొదిలేసి పంజాబ్‌ రైతులకు సాయమా?: ఈటల

తుర్కపల్లి: రాష్ట్రమొస్తే నీళ్లు, నిధులు, నియామకాలు వస్తాయని ప్రజలు ఆశించారని.. రాష్ట్రం వచ్చాక ప్రజల ఆశలు అడియాశలయ్యాయని భాజపా ఎమ్మెల్యే ఈటల రాజేందర్‌ అన్నారు. యాదాద్రి జిల్లా తుర్కపల్లిలో పలు పార్టీల కార్యకర్తలు భాజపాలో చేరారు. వారికి పార్టీ కండువా కప్పిన ఈటల.. పార్టీలోకి ఆహ్వానించారు. అనంతరం ఈటల మాట్లాడుతూ.. జెండాలు, పార్టీలు పక్కన పెట్టి రాష్ట్రం కోసం పోరాడినట్లు చెప్పారు. అంత చేసినా కల్వకుంట్ల కుటుంబం తప్ప రాష్ట్ర ప్రజలు బాగుపడలేదని విమర్శించారు. అభివృద్ధి జరగలేదని చెప్పేందుకు తుర్కపల్లి మండలమే నిదర్శనమన్నారు. వరి పంట వేయొద్దని హుకుం జారీ చేసిన ఏకైక సీఎం కేసీఆర్‌ అని.. తరుగు పేరుతో రైతులను ఆగం చేస్తున్నారని ఆక్షేపించారు. దేశంలో ఎక్కువ మద్యం అమ్మకాలు జరిగేది తెలంగాణలోనేనని వ్యాఖ్యానించారు. స్వరాష్ట్రంలోని రైతులను గాలికి వదిలేసి పంజాబ్‌ రైతులకు సాయం చేయడమేంటని ప్రశ్నించారు. రాష్ట్రంలో రైతుల చావులు సీఎం కేసీఆర్‌కు పట్టవా?అని ప్రశ్నించారు. తెలంగాణలో రానున్న రోజుల్లో కాషాయ జెండా ఎగరడం ఖాయమని ఈటల ధీమా వ్యక్తం చేశారు.