BRS: తన మిత్రుడిని కాపాడేందుకు మోదీ సర్కార్‌ యత్నం: కేశవరావు

దిల్లీ: అదానీ (adani) సంస్థల వ్యవహారంపై పార్లమెంట్‌లో చర్చ జరపకుండా.. తన మిత్రుడిని కాపాడేందుకు మోదీ (Modi) ప్రభుత్వం ప్రయత్నిస్తోందని భారాస (BRS) రాజ్యసభ సభ్యుడు కేశవరావు ఆరోపించారు. పార్లమెంట్‌లో చర్చ జరిగితే అదానీ షేర్లు మరింతగా పడిపోతాయని భాజపా (BJP) సర్కార్‌ భయపడుతోందని విమర్శించారు. ఎల్‌ఐసీ ద్వారా అదానీకి రూ.వేల కోట్ల మేలు చేశారన్నారు. ఏపీలోని కృష్ణపట్నం, గంగవరం, వైజాగ్‌లోని పోర్టులతోపాటు బాంబే ఎయిర్‌ పోర్టునూ టెండర్లు లేకుండా బెదిరింపులకు పాల్పడి అదానీకి కట్టబెట్టారని ఆరోపణలు చేశారు. అతి తక్కువకాలంలో ప్రపంచ కుబేరుడిగా అదానీ ఎలా అయ్యారో విచారణ జరిపించాలని కేకే డిమాండ్‌ చేశారు. మరోవైపు అదానీ సంస్థల షేర్లు పడిపోతున్నా.. దేశ ఆర్థిక వ్యవస్థపై ప్రభావం ఉండదని ఆర్థిక మంత్రి చెప్పడం దారుణమని భారాస ఎమ్మెల్సీ కల్వకుంట్ల కవిత అన్నారు. దేశ ప్రజల సంపద ఆవిరవుతుంటే ప్రధాని మౌనంగా ఎలా ఉంటున్నారని ప్రశ్నించారు.