UP Results: బీఎస్పీకి ఒకే సీటు.. మాయావతి ఏమన్నారంటే..!

ఉత్తర్‌ప్రదేశ్‌ ఎన్నికల ఫలితాలపై స్పందించిన బీఎస్పీ చీఫ్‌

లఖ్‌నవూ: ఉత్తర్‌ప్రదేశ్‌ అసెంబ్లీలో మొత్తం 403 స్థానాలుండగా వాటిలో బీఎస్పీ ఒకే ఒక్క నియోజకవర్గంలో గెలిచిన సంగతి తెలిసిందే. ఈ నేపథ్యంలో పార్టీ అధినేత్రి స్పందించారు. తమ పార్టీ పేలవమైన ప్రదర్శన కనబరిచినప్పటికీ పార్టీ కార్యకర్తలు నిరుత్సాహపడకూడదని యూపీ మాజీ ముఖ్యమంత్రి, బహుజన్‌ సమాజ్‌ పార్టీ (బీఎస్‌పీ) అధినేత్రి మాయావతి ధైర్యం నింపారు. తాజా ఫలితాల నుంచి పాఠాలు నేర్చుకుంటామన్న ఆమె.. భవిష్యత్తులో తప్పుకుండా అధికారంలోకి వస్తామనే ధీమా వ్యక్తం చేశారు.

‘యూపీ ఎన్నికల ఫలితాలు భాజపా అంచనాలకు వ్యతిరేకంగా వచ్చాయి. బీఎస్పీ కూడా కఠిన సమయాన్నే ఎదుర్కొంటోంది. వీటిని చూసి నిరుత్సాహపడాల్సిన అవసరం లేదు. తాజా ఫలితాల వల్ల పాఠాలు నేర్చుకోవడంతోపాటు ఆత్మపరిశీలన చేసుకొని పార్టీని మరింత ముందుకు తీసుకెళ్లాలి. తద్వారా రానున్న రోజుల్లో మరోసారి అధికారం చేపట్టవచ్చు’ అని బీఎస్పీ అధినేత్రి మాయావతి పేర్కొన్నారు. 2017కు ముందు భాజపా పరిస్థితి కూడా ఇదేనన్న ఆమె, ప్రస్తుతం కాంగ్రెస్‌ పరిస్థితి కూడా ఇలాగే ఉందన్నారు. ఈ ఫలితాలు భాజపా భవిష్యత్తుకూ ముఖ్యమైన పాఠాలేనని అన్నారు.

ఉత్తర్‌ప్రదేశ్‌ అసెంబ్లీ ఎన్నికల్లో భాజాపా, సమాజ్‌వాదీ పార్టీల మధ్యే ప్రధాన పోటీ నెలకొన్న సంగతి తెలిసిందే. చివరకు 255 స్థానాలు సాధించిన భాజపా అధికారాన్ని కాపాడుకోగా.. 111 స్థానాలతో సమాజ్‌వాదీ పార్టీ  మరోసారి ప్రతిపక్షంలో నిలిచింది. అయితే, ఇతర పార్టీలకు వచ్చిన సీట్లు, ఓట్లశాతం మాత్రం వారి భవిష్యత్తుకు ప్రాణసంకటంగా మారాయి. ముఖ్యంగా గతంలో రాష్ట్రాన్ని పాలించిన బీఎస్పీకి ఒకటి, కాంగ్రెస్‌కు రెండు స్థానాలు మాత్రమే లభించాయి.