Byreddy Rajasekhar reddy: స్కామ్‌లు చేయడం జగన్‌కు అలవాటేమో.. చంద్రబాబుకు కాదు: బైరెడ్డి

రాజమహేంద్రవరం: రాయలసీమ స్టీరింగ్‌ కమిటీ ఛైర్మన్‌ బైరెడ్డి రాజశేఖర్‌రెడ్డి రాజమహేంద్రవరంలో తెదేపా అధినేత చంద్రబాబు సతీమణి నారా భువనేశ్వరిని కలిసి సంఘీభావం తెలిపారు. దేశ రాజకీయాలను ప్రభావితం చేసిన నాయకుడు చంద్రబాబు అని కొనియాడారు. ఆర్థిక నేరాలు చేసి బెయిల్‌పై ఉన్న వ్యక్తి జగన్ అని విమర్శించారు. కుంభకోణాలు చేయడం జగన్‌కు అలవాటేమో కానీ చంద్రబాబుకు కాదన్నారు. చంద్రబాబు అనుభవం అంత వయస్సు కూడా సీఎం జగన్‌కు లేదన్నారు. ఆయన్ను తప్పుడు కేసుల్లో ఇరికించడాన్ని తీవ్రంగా ఖండిస్తున్నట్లు చెప్పారు.

ప్రజల మద్దతు ఉన్నంత వరకు తెలుగుదేశం పార్టీని ఎవ్వరూ ఏమీ చేయలేరని ధీమా వ్యక్తం చేశారు. అప్రజాస్వామికంగా చంద్రబాబును జైల్లో పెట్టారని అసహనం వ్యక్తం చేశారు. ఎంతమందిని అరెస్టు చేసినా, ఎన్ని తప్పుడు కేసులు పెట్టినా తెలుగుదేశం పార్టీని ఏమీ చేయలేదరన్నారు. తెదేపా అధికారంలోకి వస్తేనే రాష్ట్రంలో అభివృద్ధి సాధ్యం అవుతుందన్నారు.