బెంగాల్‌లో హ్యాట్రిక్‌ సాధిస్తాం: మమతా

కోల్‌కతా: బెంగాల్‌ రైతులకు పీఎం కిసాన్‌ లబ్ది చేకూర్చే విషయంలో కేంద్ర ప్రభుత్వం అబద్ధాలు చెబుతోందంటూ పశ్చిమబెంగాల్‌ సీఎం మమతా బెనర్జీ ఆరోపించారు. రాష్ట్రంలోని రైతులకు పీఎం కిసాన్‌ ఇవ్వాలని తాము జాబితా పంపినప్పటికీ కేంద్రం నిధులు ఇవ్వడానికి నిరాకరించిందని ఆమె విమర్శించారు. ఈ మేరకు మమతా బెనర్జీ మంగళవారం పుర్బ వర్దమాన్‌ జిల్లాలోని కల్నాలో నిర్వహించిన సభలో కేంద్ర ప్రభుత్వంపై విరుచుకుపడ్డారు. 

‘నూతన సాగు చట్టాలకు వ్యతిరేకంగా దిల్లీ సరిహద్దుల్లో ఆందోళన చేస్తున్న రైతులు ఎన్నో ఇబ్బందులు ఎదుర్కొంటున్నారు. కానీ కేంద్రం వారిని పట్టించుకోవడం లేదు. భాజపా దేశాన్ని భ్రష్టు పట్టిస్తోంది. బెంగాల్‌ను అలా కావడాన్ని మేం అనుమతించం. మా పార్టీ ప్రజల్లో మతం, కులం ఆధారంగా విభజన రాజకీయాలు చేయదు. రాష్ట్రంలోని రైతులకు టీఎంసీ ప్రభుత్వం ఒక్కొక్కరికి రూ.5వేలు ఇస్తోంది. అంతేకాకుండా ఉచిత పంట బీమా సౌకర్యం కూడా కల్పిస్తోంది. కానీ కేంద్రంలోని భాజపా ప్రభుత్వం తొలుత రాష్ట్ర రైతులకు పీఎం కిసాన్‌ నిధులు ఇవ్వడానికి నిరాకరించింది. ఇప్పుడు టీఎంసీ ప్రభుత్వమే రైతుల్ని ఆ పథకానికి దూరం చేసిందని అబద్ధాలు చెబుతోంది’ అని మమతా భాజపాపై మండిపడ్డారు. బెంగాల్‌లో త్వరలో జరగబోయే అసెంబ్లీ ఎన్నికల్లో టీఎంసీ ఘన విజయం సాధించి.. మరోసారి ప్రభుత్వాన్ని ఏర్పాటు చేస్తుంది అని  ధీమాను వ్యక్తం చేశారు. 294 స్థానాలున్న బెంగాల్‌ అసెంబ్లీకి ఏప్రిల్‌, మే నెలల్లో ఎన్నికలు జరగనున్నాయి. 

ఇదీ చదవండి

హిందుస్థానీ ముస్లింగా గర్విస్తున్నా: ఆజాద్‌