TDP Formation Day: ప్రజల జీవితాల్లో తెదేపా వెలుగులు నింపింది: చంద్రబాబు

అమరావతి: ఆత్మగౌరవ నినాదంతో పుట్టి తెలుగు ప్రజల జీవితాల్లో తెదేపా వెలుగులు నింపిందని ఆ పార్టీ అధినేత చంద్రబాబు అన్నారు. తెదేపా ఆవిర్భావ దినోత్సవం సందర్భంగా తెలుగుజాతికి ఆయన శుభాకాంక్షలు తెలిపారు.ఈ మేరకు ఆయన ట్వీట్‌ చేశారు. అన్న ఎన్టీఆర్‌ ఆశయ సాధనకు ప్రతి ఒక్కరూ పునరంకితం కావాలని చంద్రబాబు పిలుపునిచ్చారు. 

సకల రంగాల అభివృద్ధిపై తెదేపా సంతకం చెరగనిది: లోకేశ్‌

తెలుగుజాతి ఆత్మగౌరవ పతాకంగా, రాజకీయ చైతన్యానికి సంకేతంగా తెదేపా ఆవిర్భవించి 41 ఏళ్లు పూర్తయిందని ఆపార్టీ జాతీయ ప్రధాన కార్యదర్శి నారా లోకేశ్‌ అన్నారు. ఈ సందర్భంగా అందరికీ ఆయన శుభాకాంక్షలు తెలిపారు.   అన్న ఎన్టీఆర్‌ ఆశయాల మేరకు అణగారిన వర్గాలకు పసుపు జెండా అండగా నిలిచిందని చెప్పారు. పార్టీ ఆవిర్భావ దినోత్సవం సందర్భంగా ఆయన ట్వీట్‌ చేశారు. బడుగు బలహీనవర్గాలకు తెదేపా భరోసాగా నిలిచిందని.. మహిళల స్వావలంబనకు చేయూత అందించిందని లోకేశ్‌ పేర్కొన్నారు. సకల రంగాల అభివృద్ధిపైనా తెదేపా సంతకం చెరగనిదని చెప్పారు. దేశంలో ఏ రాజకీయ పార్టీకి లేని లక్షలాది కార్యకర్తల సైన్యం తెదేపా బలమని కొనియాడారు. ‘‘నేను తెలుగువాడినని సంతోషిస్తాను.. తెలుగుదేశం వాడినని గర్విస్తాను’’ అని లోకేశ్‌ తన ట్వీట్‌లో పేర్కొన్నారు.