CM Jagan: కుప్పంలో భరత్‌ను గెలిపిస్తే.. మంత్రి పదవి ఇస్తా: సీఎం జగన్‌

అమరావతి: వచ్చే ఎన్నికల్లో 175 సీట్లు గెలుస్తామంటున్న ముఖ్యమంత్రి జగన్‌... తెలుగుదేశం అధినేత చంద్రబాబు ప్రాతినిథ్యం వహిస్తున్న కుప్పం నుంచే ఆ దిశగా తొలి అడుగు పడాలని వైకాపా నాయకులకు దిశానిర్దేశం చేశారు. కుప్పం నియోజకవర్గ పార్టీ నాయకులతో సమావేశమైన జగన్‌.. వివిధ అంశాలపై వారికి సూచనలు చేశారు. కుప్పం తన సొంత నియోజకవర్గం లాంటిదని, వచ్చే ఎన్నికల్లో పార్టీ అభ్యర్థి భరత్‌ను గెలిపిస్తే మంత్రి పదవి ఇస్తామని హామీ ఇచ్చారు. కుప్పం మున్సిపాలిటీలో వివిధ అభివృద్ధి పనులకోసం భరత్‌ ఇచ్చిన ప్రతిపాదనల మేరకు రూ.65 కోట్లు మంజూరు చేస్తున్నట్టు సీఎం ప్రకటించారు. మరో రెండు రోజుల్లో జీవో విడుదలవుతుందని, పనులు కూడా మొదలు పెట్టొచ్చన్నారు. కుప్పానికి సంబంధించి ఇంకా ఏమైనా సమస్యలు ఉంటే వెంటనే పరిష్కరించనున్నట్టు చెప్పారు. కుప్పం నియోజకవర్గాన్ని కూడా తన సొంత నియోజకవర్గంగా భావిస్తానని చెప్పారు. ఈ మూడేళ్లలో కుప్పం నియోజకవర్గానికి అత్యధికంగా మేలు జరిగిందని,  కుప్పం అభివృద్ధికి అన్ని వేళలా అండగా ఉంటానన్నారు. 175 సీట్లు గెలిచే పరిస్థితి కుప్పం నుంచే మొదలు కావాలని పార్టీ నేతలకు దిశానిర్దేశం చేశారు. ఈ సమావేశంలో భరత్‌తో పాటు మంత్రి పెద్దిరెడ్డి రామచంద్రారెడ్డి, పలువురు ముఖ్యనేతలు పాల్గొన్నారు.