CM KCR: కవితకు ఈడీ నోటీసు.. భయపడే ప్రసక్తే లేదు: సీఎం కేసీఆర్‌

హైదరాబాద్‌: మద్యం కుంభకోణం వ్యవహారంలో (Delhi Liqour scam) ఎమ్మెల్సీ కవిత (MLC Kavitha)కు ఎన్‌ఫోర్స్‌మెంట్‌ డైరెక్టరేట్‌ (ED) ఇచ్చిన నోటీసులపై సీఎం కేసీఆర్‌ (CM KCR) స్పందించారు. తెలంగాణ భవన్‌లో జరిగిన  భారత రాష్ట్ర సమితి విస్తృతస్థాయి సమావేశంలో పార్టీ అధినేత, ముఖ్యమంత్రి కేసీఆర్ కీలక వ్యాఖ్యలు చేశారు. భాజపా ఉద్దేశపూర్వకంగా తమ పార్టీ నేతలను వేధిస్తోందన్న ఆయన... మంత్రులు మల్లారెడ్డి, గంగుల కమలాకర్‌, ఎంపీ రవిచంద్రను ఇబ్బంది పెట్టారని, ఇప్పుడు  ఎమ్మెల్సీ కవితకు నోటీసులు ఇచ్చారని  వ్యాఖ్యానించారు.

కేంద్రంలోని భాజపా వేధింపులకు ఆందోళన చెందాల్సిన, బెదరాల్సిన అవసరం లేదన్న సీఎం కేసీఆర్‌.. కమలం పార్టీని గద్దె దింపడమే లక్ష్యంగా మరింత బలంగా పోరాటం చేద్దామని నేతలకు స్పష్టం చేశారు. ఎమ్మెల్సీ కవితకు ఈడీ నోటీసు ఇచ్చారని.. ఏం చేస్తారో చేసుకోనివ్వండని వ్యాఖ్యానించారు. ప్రజాస్వామ్య, న్యాయబద్ధంగా ఎదుర్కొందామని నేతలకు వివరించారు.  దిల్లీ లిక్కర్‌ స్కామ్‌ వ్యవహారంలో ఎమ్మెల్సీ కవిత  శనివారం ఉదయం ఈడీ విచారణకు హాజరు కానున్నారు. ఈ నేపథ్యంలో మంత్రి కేటీఆర్‌ దిల్లీ బయల్దేరి వెళ్లారు.