KTR: నా పర్యటనలు తక్కువ అయ్యాయని తిట్టుకోవద్దు: మంత్రి కేటీఆర్‌

గంభీరావుపేట: సిరిసిల్ల జిల్లాలో ఒక్క రోజులోనే 4 గ్రామాల్లో 378 డబుల్ బెడ్ రూమ్ ఇళ్లను ప్రారంభించి పంపిణీ చేసినట్లు మంత్రి కేటీఆర్‌ వెల్లడించారు. గంభీరావుపేటలోని ఎస్సీ కాలనీలో 104, బీసీ కాలనీలో 168 డబుల్ బెడ్ రూమ్ ఇళ్ల సముదాయాన్ని మంత్రి ప్రారంభించారు. ఈ సందర్భంగా ఏర్పాటు చేసిన సమావేశంలో ఆయన మాట్లాడారు. 

‘‘జిల్లాలో ఈ మధ్య నా పర్యటనలు తక్కువ అయ్యాయని ఎవరూ తిట్టుకోవద్దు. రైతులను దృష్టిలో పెట్టుకొని ముఖ్యమంత్రి కేసీఆర్‌ ఎన్నో గొప్పగొప్ప ఆలోచనలు చేశారు. జనాన్ని గందరగోళానికి గురిచేయడమే కాంగ్రెస్ పార్టీ పని. వారంటీ లేని ఆ పార్టీ గ్యారంటీలు ఇస్తే ప్రజలు నమ్ముతారా? ఎన్నికల్లో  గెలిచేందుకు నేను మందు పోయను.. పైసలు ఇవ్వను. ఇలా  చెప్పే దమ్ము, ధైర్యం ఆ పార్టీలో ఎవరికైనా ఉందా? కాంగ్రెస్ పార్టీ వివిధ రాష్ట్రాల నుంచి డబ్బులు తెచ్చి ఎన్నికల్లో  గెలవాలని చూస్తోంది. ఆ డబ్బులు తీసుకొని కారు గుర్తుకు ఓటు వేయండి. ముచ్చటగా మూడోసారి కేసీఆర్‌ను ముఖ్యమంత్రిగా గెలిపించాలి’’ అని మంత్రి కేటీఆర్‌ కోరారు.