Munugode ByPoll: మునుగోడులో తెరాసకే సీపీఐ మద్దతు: చాడ వెంకట్‌ రెడ్డి

హైదరాబాద్: స్వార్థం కోసమే తన ఎమ్మెల్యే పదవికి రాజగోపాల్‌ రెడ్డి రాజీనామా చేశారని  సీపీఐ రాష్ట్ర కార్యదర్శి చాడ వెంకట్ రెడ్డి ఆరోపించారు. సీపీఐ రాష్ట్ర కార్యవర్గ సమావేశం అనంతరం సీపీఐ నేతలు నారాయణ మరికొందరితో కలిసి ఆయన మీడియాతో మాట్లాడారు. ‘‘మునుగోడులో ఐదు సార్లు సొంతంగా గెలిచాం. రెండు సార్లు ఇతర పార్టీల మద్దతుతో గెలిచాం. భాజపాను ఓడించే పార్టీకే మా మద్దతు ఉంటుంది. భాజపాకు ఓటు అడిగే హక్కు లేదు. విభజన హామీలను ఏ ఒక్కటీ అమలు చేయలేదు. మునుగోడులో తెరాసకు మద్దతు ఇస్తున్నాం. మునుగోడు సభకు సీపీఐ నేతలు రావాలని ముఖ్యమంత్రి కేసీఆర్‌ కోరారు. మునుగోడే కాదు అన్ని ఎన్నికల్లో తెరాసతో కలిసి పని చేస్తాం’’

‘‘తెరాసకు మద్దతు ఇచ్చినంతా మాత్రాన ప్రజల సమస్యలపై మా పోరాటం ఆగదు. రాజ్యాంగమే ప్రమాదంలో పడే పరిస్థితి వచ్చింది.. రక్షించేందుకే కమ్యూనిస్టులు అప్రమత్తమయ్యారు. ప్రగతిశీల శక్తుల ముందు నిలవలేమని రేపు అమిత్ షాకు అర్థమవుతుంది. మునుగోడులో పోటీ చేసేందుకు సీపీఐ సిద్ధంగా లేదు. అందుకే తెరాసకు మద్దతు ఇస్తున్నాం’’ అని చాడ వెంకట్‌ రెడ్డి అధికారికంగా ప్రకటించారు.