Andhra news: ‘ముమ్మాటికీ వికేంద్రీకరణే మా ప్రభుత్వ విధానం’: బొత్స సత్యనారాయణ

విజయనగరం: ముమ్మాటికీ వికేంద్రీకరణే వైకాపా ప్రభుత్వ విధానమని.. ప్రతిపక్షాల అభిప్రాయాలు ప్రామాణికం కాదని మంత్రి బొత్స సత్యనారాయణ స్పష్టం చేశారు. రాష్ట్రంలోని 13 జిల్లాల్లో అభివృద్ధి జరగాలన్నదే ప్రభుత్వ లక్ష్యమన్నారు. శివరామకృష్ణ కమిషన్‌ కూడా వికేంద్రీకరణే సూచించిందని పేర్కొన్నారు. స్వార్థం కోసం పోలవరాన్ని, ప్రత్యేక హోదాను తెదేపా తాకట్టు పెట్టిందని ధ్వజమెత్తారు. జిల్లాల పునర్విభజనపై వచ్చిన విజ్ఞప్తులను కమిటీ పరిశీలిస్తోందని చెప్పారు. ఉగాది నుంచి కొత్త జిల్లాల్లో పాలన ప్రారంభం అవుతుందని వెల్లడించారు. రాష్ట్రంలో అభివృద్ధి జరగాలంటే పరిపాలనా వికేంద్రీకరణ జరగాల్సిందేనని పునరుద్ఘాటించారు. వికేంద్రీకరణ కోసం ఏం చేయాలో అది చేస్తామని బొత్స స్పష్టం చేశారు.