Meenakshi lekhi: అలాంటి ‘పార్ట్‌ టైం సీఎం’ దిల్లీకి అవసరం లేదు: కేంద్రమంత్రి విమర్శలు

దిల్లీ: గుజరాత్‌, హిమాచల్‌ ప్రదేశ్‌ ఎన్నికల ప్రచారంలో బిజీగా ఉన్న ఆప్‌ జాతీయ కన్వీనర్‌, దిల్లీ సీఎం అర్వింద్‌ కేజ్రీవాల్‌(Arvind Kejriwal)పై కేంద్రమంత్రి మీనాక్షీ లేఖి(Meenakshi Lekhi) తీవ్రస్థాయిలో విరుచుకుపడ్డారు. దిల్లీలో సమస్యలు పట్టించుకోకుండా ‘రాజకీయ పర్యాటకం’లో బిజీగా గడుపుతున్నారని.. అలాంటి పార్ట్‌ టైం సీఎం దిల్లీ ప్రజలకు అవసరం లేదంటూ ధ్వజమెత్తారు. బుధవారం ఆమె దిల్లీలో మీడియా సమావేశంలో మాట్లాడారు. ఆర్టీఐ ద్వారా సేకరించిన గణాంకాలను ఉటంకిస్తూ.. పర్యాటక సెస్‌ కింద గత ఏడేళ్లుగా రూ.1286 కోట్లు వసూలు చేసిన కేజ్రీవాల్‌ ప్రభుత్వం కాలుష్య నియంత్రణకు కేవలం రూ.272 కోట్లు మాత్రమే ఖర్చు చేసిందన్నారు. కాలుష్యాన్ని ఎదుర్కోవడానికి మౌలిక సదుపాయాల కల్పనకు గానీ సిబ్బందికి శిక్షణ ఇవ్వడానికి నిధులు ఖర్చు చేయలేదని ఆరోపించారు.

‘‘కేజ్రీవాల్‌ ఏమీ చేయడంలేదు. ఎన్నికల రాష్ట్రాల్లో ప్రచారం చేస్తూ రాజకీయ పర్యాటకంలో తన సమయాన్ని గడుపుతోన్న ఇలాంటి పార్ట్‌ టైం ముఖ్యమంత్రి దిల్లీకి అవసరం లేదు. కేజ్రీవాల్‌ ప్రభుత్వం నిష్క్రియత్వం, బాధ్యతల నుంచి పారిపోతుండటంతో దిల్లీలో పెద్ద సంఖ్యలో వృద్ధులు, చిన్నారులు వాయు కాలుష్య సంబంధిత వ్యాధులతో బాధపడుతున్నారు’’ అని ఆరోపించారు. దేశ రాజధాని నగరంలో 10 స్మాగ్‌ టవర్లు నిర్మిస్తామని హామీ ఇచ్చిన కేజ్రీవాల్‌ రూ22 కోట్లతో కేవలం ఒక్కటి మాత్రమే నిర్మించారన్నారు. దీని నిర్వహణకు ప్రతి నెలా రూ.80లక్షలు ఖర్చు చేస్తున్నా అది కూడా సరిగా పనిచేయడంలేదన్నారు. స్మాగ్‌ టవర్‌ నిర్వహణకు అంత భారీగా వ్యయం చేస్తున్నా అది ఎందుకు పనిచేయడంలేదనే అంశంపై దర్యాప్తు జరిపించాలని లెఫ్టినెంట్‌ గవర్నర్‌ వీకే సక్సేనాను మీనాక్షి కోరారు.