UP Polls 2022: డబుల్‌ ఇంజిన్‌ ప్రభుత్వాలంటే డబుల్‌ కరప్షన్‌: అఖిలేశ్‌

బిజ్నోర్‌: యూపీలో ఎన్నికల వేళ ప్రధాని నరేంద్ర మోదీ, యూపీ సీఎం యోగి ఆదిత్యనాథ్‌ డబుల్‌ ఇంజిన్‌ ప్రభుత్వాలతోనే అభివృద్ధి సాధ్యమవుతుందనీ.. రాష్ట్రంలో భాజపాను గెలిపించాలంటూ ఓటర్లకు చేస్తున్న విజ్ఞప్తిపై సమాజ్‌వాదీ పార్టీ అధ్యక్షుడు అఖిలేశ్ యాదవ్‌ విమర్శలు గుప్పించారు. యూపీలో డబుల్‌ ఇంజిన్‌ ప్రభుత్వం డబుల్‌ కరెప్షన్‌కి దారితీసిందంటూ ధ్వజమెత్తారు. బిజ్నోర్‌లో నిర్వహించిన భారీ ర్యాలీలో ఆర్‌ఎల్‌డీ అధ్యక్షుడు జయంత్‌ సింగ్‌ చౌధురితో కలిసి ఆయన మాట్లాడారు. ఈ సందర్భంగా దిల్లీలో నిర్మిస్తున్న కొత్త పార్లమెంట్‌ భవనం నిర్మాణాన్ని ప్రస్తావించిన అఖిలేశ్‌.. ‘నూతన లోక్‌సభ భవనంలోకి ఏ రాజ్యాంగాన్ని తీసుకొస్తారో ఎవరికి తెలుసు? యూపీ ఎన్నికల్లో భాజపాను నిలువరించడం అత్యావశ్యకం. ఎందుకంటే దీని తర్వాత అంబేడ్కర్‌  రచించిన రాజ్యాంగాన్ని మార్చేందుకు సైతం భాజపా ఏమైనా చేస్తుంది’ అని వ్యాఖ్యానించారు.

చిన్న నేతలు చిన్న చిన్న అబద్ధాలు.. పెద్ద నేతలు పెద్ద పెద్ద అబద్ధాలు ఆడుతున్నారంటూ భాజపాపై విరుచుకుపడ్డారు. అవినీతిని అంతం చేయడానికే పెద్ద నోట్లు రద్దుచేస్తున్నామనీ చెప్పారనీ.. కానీ డబుల్ ఇంజిన్‌ ప్రభుత్వాలంటే డబుల్‌ డబుల్‌ కరెప్షన్‌గా పరిస్థితి మారిపోయిందన్నారు. ప్రస్తుతం ఈ డబుల్‌ ఇంజిన్‌ ప్రభుత్వాలు ఒకరి చక్రాలను మరొకరు తొలగించుకొనే పనిలో బిజీగా ఉన్నారంటూ అఖిలేశ్‌ ఎద్దేవా చేశారు.  యూపీలో సమాజ్‌వాదీ పార్టీ, ఆర్‌ఎల్‌డీ కూటమికి ప్రజల నుంచి అపూర్వమైన మద్దతు వస్తోందనీ.. మార్చి 10న ఏర్పడేది తమ ప్రభుత్వమేనన్నారు.