Telangana News: భాజపాపై ఉన్న కోపాన్ని కేసీఆర్‌ రైతులపై చూపిస్తున్నారు: ఈటల రాజేందర్‌

హైదరాబాద్‌ : భారతీయ జనతా పార్టీపై ఉన్న కోపాన్ని సీఎం కేసీఆర్ రైతాంగం మీద చూపిస్తున్నారని హుజూరాబాద్ ఎమ్మెల్యే ఈటల రాజేందర్ ధ్వజమెత్తారు. ఎప్పుడు ఎన్నికలు వచ్చినా కేసీఆర్ ప్రభుత్వం కూలిపోవడం ఖాయమన్నారు. ధాన్యం సేకరణ కొత్తగా వచ్చింది కాదని.. దశాబ్దాలుగా కొనసాగుతుందని తెలిపారు. భాజపా రాష్ట్ర కార్యాలయంలో ఈటల మీడియాతో మాట్లాడారు. ధాన్యం సేకరణ విషయంలో రాష్ట్ర ప్రభుత్వం ఒక ఏజెన్సీలా పనిచేస్తుందని ఆరోపించారు. ధాన్యం పండించి పార్టీ కార్యాలయాలు, ఇళ్ల ముందు పోస్తామని సీఎం బాధ్యత లేకుండా మాట్లాడుతున్నారని విమర్శించారు. వరి వేయొద్దంటే రైతుల పరిస్థితేంటని ప్రశ్నించారు. తెలంగాణలో పండిన ధాన్యాన్ని కొనుగోలు చేయమని కేంద్రం ఎక్కడా చెప్పలేదన్నారు. భాజపా అధికారంలోకి వచ్చాక ప్రతి పంటను కొనుగోలు చేస్తామని ఈటల స్పష్టం చేశారు. రాష్ట్ర రైతాంగం ప్రయోజనాల కోసం తెలంగాణ భాజపా శాఖ కృషి చేస్తుందన్నారు.