Hyderabad: భాజపా కార్యాలయం వద్ద విజయోత్సవ వేడుకల్లో అపశృతి

హైదరాబాద్‌: నాంపల్లిలోని భాజపా రాష్ట్ర కార్యాలయం వద్ద విజయోత్సవ వేడుకల్లో అపశృతి చోటు చేసుకుంది. గుజరాత్‌లో భాజపా ఘన విజయం సాధించిన నేపథ్యంలో ఆపార్టీ శ్రేణులు సంబరాలు చేసుకున్నారు. భాజపా కార్యాలయం వద్ద టపాసులు పేల్చి, మిఠాయిలు పంచారు. ఈక్రమంలో నిప్పురవ్వలు ఎగసిపడి పార్టీ కార్యాలయం సమీపంలో ఉన్న విద్యుత్ తీగలు, ఫ్లెక్సీలపై పడ్డాయి. దీంతో పెద్ద ఎత్తున మంటలు చెలరేగాయి. వెంటనే అప్రమత్తమైన భాజపా శ్రేణులు అగ్నిమాపక సిబ్బందికి సమాచారమందించి, మంటలు ఆర్పేందుకు  ప్రయత్నించారు. విద్యుత్‌ వైర్లు దగ్ధం కావడంతో స్థానికులు భయాందోళనకు గురయ్యారు.