గృహనిర్బంధం నుంచి తప్పించుకొని పోలీస్‌స్టేషన్‌కు..

లోకేశ్‌ను విడుదల చేయాలంటూ పంచుమర్తి, వైవీబీ ఆందోళన

విజయవాడ: అమరావతి రైతులు చేపట్టిన జాతీయ రహదారి దిగ్బంధం కార్యక్రమం ఉద్రిక్తతలకు దారితీసింది. ఈ కార్యక్రమం నేపథ్యంలో పోలీసులు అనేక మంది విపక్ష నేతలను గృహనిర్బంధం చేయగా.. చినకాకాని వద్ద తెదేపా జాతీయ ప్రధాన కార్యదర్శి నారా లోకేశ్‌ సహా పలువురిని అరెస్టు చేసిన విషయం తెలిసిందే. అయితే, గృహనిర్బంధంలో ఉన్న తెదేపా ఎమ్మెల్సీ వైవీబీ రాజేంద్రప్రసాద్‌ పోలీసుల నుంచి తప్పించుకొని తోట్లవల్లూరు పోలీస్‌ స్టేషన్‌కు చేరుకున్నారు. ఆయనతో పాటు భారీ సంఖ్యలో తెదేపా కార్యకర్తలు అక్కడికి చేరుకొని నారా లోకేశ్, ఇతర నేతలను విడుదల చేయాలని డిమాండ్‌ చేశారు. మరోవైపు, తోట్లవల్లూరు పోలీస్‌ స్టేషన్‌ వద్ద తెదేపా మహిళా నేత పంచుమర్తి అనురాధ బైఠాయించి నిరసన తెలిపారు. మూడు రాజధానులు వద్దు.. అమరావతే ముద్దు అంటూ నినాదాలు చేశారు.