మండలి రద్దుపై కేబినెట్‌లో తీర్మానం..?

అమరావతి: శాసన మండలిని రద్దు చేసే దిశగా ప్రభుత్వం ప్రతిపాదనలను సిద్ధం చేసేందుకు యోచిస్తున్నట్లు తెలుస్తోంది. సోమవారం ఉదయం 9.30 గంటలకు కేబినెట్‌ భేటీ నిర్వహించాలని ప్రభుత్వం నిర్ణయించింది. ఈ భేటీలో శాసన మండలి రద్దుపై చర్చించే అవకాశమున్నట్లు సమాచారం. అనంతరం 11 గంటలకు శాసనసభ సమావేశం కానుంది. 

సచివాలయంలోని మొదటి బ్లాక్‌లో సీఎం జగన్‌ అధ్యక్షతన కేబినెట్‌ భేటీ జరగనుంది. ఈ సమావేశంలో శాసన మండలి రద్దుపై తీర్మానం చేసి దాన్ని ఆమోదించే అవకాశమున్నట్లు తెలుస్తోంది. అనంతరం శాసనసభలో తీర్మానం ప్రవేశపెట్టి దానిపై చర్చించిన తర్వాత ఆమోదం తెలిపే వీలుంది. సభలో ఆమోదం పొందిన తర్వాత బిల్లును పార్లమెంట్‌ ఆమోదం కోసం పంపేందుకు రాష్ట్ర ప్రభుత్వం కసరత్తు చేస్తున్నట్లు ప్రచారం జరుగుతోంది.