రాజధాని తరలింపును ఆపలేరు: కన్నబాబు

విజయవాడ: తెదేపా మోకాలు అడ్డుపెట్టినంత మాత్రాన మూడు రాజధానుల ఏర్పాటు ఆగబోదని ఏపీ మంత్రి కురసాల కన్నబాబు అన్నారు. సంఖ్యాబలం ఉందని శాసన మండలిలో కుట్రలు చేసి ఇప్పటి వరకు మూడు బిల్లులను అడ్డుకున్నారని ఆయన విమర్శించారు. విజయవాడలో కన్నబాబు మీడియాతో మాట్లాడారు. కొద్దిరోజులు ఆలస్యమైనా రాజధాని తరలింపును ఆపలేరని.. అందులో సందేహం ఎందుకని ప్రశ్నించారు. ప్రజల ఆకాంక్షల మేరకు అభివృద్ధి వికేంద్రీకరణ, పరిపాలన వికేంద్రీకరణకు ప్రభుత్వం నిర్ణయం తీసుకుందన్నారు. శాసన మండలి ఛైర్మన్‌కు విచక్షణాధికారం ఉన్నప్పుడు..తాను ఎక్కడ కూర్చొని పరిపాలించాలనే విషయంలో సీఎంకు అధికారం ఉండదా? అని ప్రశ్నించారు. ఎక్కడ సీఎం ఉంటే వ్యవస్థంతా అక్కడే ఉంటుందని చెప్పారు.