ఎమ్మెల్యే బాలకృష్ణకు చేదు అనుభవం

హిందూపురం: అనంతపురం జిల్లా హిందూపురం ఎమ్మెల్యే బాలకృష్ణకు సొంత నియోజకవర్గంలోనే చేదు అనుభవం ఎదురైంది. గురువారం నియోజకవర్గ పర్యటనలో భాగంగా బాలకృష్ణ హిందూపురం వచ్చారు. ఈ విషయం తెలుసుకున్న కొందరు వైకాపా శ్రేణులు అక్కడికి చేరుకొని ‘బాలయ్య గో బ్యాక్‌’ అంటూ ఫ్లకార్డులు ప్రదర్శించి పర్యటనను అడ్డుకునే ప్రయత్నం చేశారు. బాలకృష్ణ వాహనానికి రహమత్‌ సర్కిల్‌ వద్ద వైకాపా శ్రేణులు అడ్డురావడంతో ఉద్రిక్తత నెలకొంది. పోలీసులు జోక్యం చేసుకొని వైకాపా కార్యకర్తలను అదుపులోకి తీసుకున్నారు. దీంతో పరిస్థితి సద్దుమణిగింది. అనంతరం ఎమ్మెల్యే బాలకృష్ణ తన పర్యటనను యథావిధిగా కొనసాగించారు.