సీఎం జగన్‌కు కన్నా లేఖ

గుంటూరు: అమరావతి నుంచి విశాఖకు పరిపాలన రాజధాని మార్చడం సరైన నిర్ణయం కాదని భాజపా రాష్ట్ర అధ్యక్షుడు కన్నా లక్ష్మీనారాయణ పునరుద్ఘటించారు. ఈ మేరకు సీఎం జగన్‌కు ఆయన లేఖ రాశారు. మూడు రాజధానుల నిర్ణయం వల్ల రాష్ట్రంలోని అన్ని వర్గాల ప్రజలు నిరసన వ్యక్తం చేస్తున్నారన్నారు. అభివృద్ధి వికేంద్రీకరణకు మాత్రమే భాజపా అనుకూలమని..పరిపాలన వికేంద్రీకరణకు కాదని చెప్పారు. ఇటువంటి అనాలోచిత నిర్ణయాలతో అభివృద్ధి కుంటుపడి తీవ్ర ఆర్థిక భారం పడుతుందన్నారు. విశాఖను రాజధానిగా చేస్తే ఎదురయ్యే సమస్యలను జీఎన్‌ రావు కమిటీ చెప్పినా పట్టించుకోవటం లేదని కన్నా ఆక్షేపించారు. అమరావతిలోనే శాసన, పరిపాలనా రాజధానులను కొనసాగించాలని భాజపా డిమాండ్‌ చేస్తోందన్నారు. రాష్ట్ర ప్రభుత్వం మొండి వైఖరిని విడనాడి ప్రజల అభీష్టానికి అనుగుణంగా నడుచుకోవాలని ఆయన హితవు పలికారు.