‘మోదీ.. ప్రధానిలా వ్యవహరించడం లేదు’

దిల్లీ: ప్రధాన మంత్రిలా నరేంద్రమోదీ వ్యవహరించడం లేదని కాంగ్రెస్‌ నేత రాహుల్‌ గాంధీ అన్నారు. రాహుల్‌ను ఉద్దేశించి ‘ట్యూబ్‌లైట్‌’ అని ప్రధాని గురువారం వ్యాఖ్యానించిన నేపథ్యంలో ఆయన ఈ విధంగా స్పందించారు. ఈ మేరకు శుక్రవారం పార్లమెంట్‌ బయట మీడియాతో మాట్లాడారు. ‘‘ప్రధాని అంటే హుందాగా ఉండాలి. ఉన్నతంగా వ్యవహరించాలి. మన ప్రధాని మాత్రం అలా వ్యవహరించడం లేదు’’ అని రాహుల్‌ గాంధీ అన్నారు. పార్లమెంట్‌లో ప్రభుత్వాన్ని ప్రశ్నించకుండా తమను అడ్డుకుంటున్నారని ఆరోపించారు. నిరుద్యోగం చర్చ జరగాలని తాము కోరుతుంటే అడ్డుకోవాలని భాజపా చూస్తోందని విమర్శించారు.