రాయిటర్స్‌ను ప్రభావితం చేశారు: ఎంపీ మాధవ్‌

అనంతపురం: రాజధానిని రాయలసీమలోనే ఏర్పాటు చేయాలని హిందూపురం ఎంపీ గోరంట్ల మాధవ్‌  సీఎం జగన్‌కు విజ్ఞప్తి చేశారు. కియా తరలిపోతుందనే అవాస్తవ ప్రచారాన్ని రాయిటర్స్‌ సంస్థ ద్వారా చంద్రబాబు సృష్టించి భంగపడ్డారని ఆరోపించారు. రాయిటర్స్‌ను చంద్రబాబు ప్రభావితం చేశారని విమర్శించారు. రాయలసీమ జిల్లాల్లో ఇంకా దుర్బర పరిస్థితులు కొనసాగుతున్నాయన్నారు. రాయలసీమ అభివృద్ధిని అడ్డుకోవద్దని చంద్రబాబును కోరారు. రాయలసీమకు జగన్‌ చేస్తున్నది ఇంకా తక్కువేనని మాధవ్‌ అభిప్రాయపడ్డారు. పార్లమెంట్‌లో తాను తెదేపా ఎంపీలపై దాడి చేశానంటూ చేస్తున్న ప్రచారాన్ని ఆయన ఖండించారు. లోక్‌సభలో కియాపై అసత్యాలను ప్రస్తావిస్తుంటే అడ్డుకున్నానని, అది తన బాధ్యత అని స్పష్టం చేశారు.