ఏపీ ఈఎస్‌ఐలో రూ.70కోట్ల అవినీతి!

అమరావతి: ఏపీ ఈఎస్‌ఐలో భారీగా అవకతవకలు జరిగినట్లు విజిలెన్స్‌ అధికారులు గుర్తించారు. రూ.975 కోట్లతో కొనుగోలు చేసిన ఔషధాలు, పరికరాల్లో రూ.70 కోట్ల అవినీతి జరిగినట్లు అధికారులు తేల్చారు. 2014-2019 వరకు జరిపిన కొనుగోళ్ల డాక్యుమెంట్లను విజిలెన్స్‌ అధికారులు పరిశీలించగా ముగ్గురు డైరెక్టర్ల పదవీకాలంలో అవకతవకలు జరిగినట్లు గుర్తించారు. రాష్ట్ర వ్యాప్తంగా 4 ఈఎస్‌ఐ ఆస్పత్రులు, 3 డయాగ్నోస్టిక్‌ సెంటర్లు, 78 ఈఎస్‌ఐ డిస్పెన్సరీలకు ఔషధాలు, పరికరాల కొనుగోలులో అవినీతి జరిగింది. ఈఎస్‌ఐలో జరిగిన అవకతవకలపై విజిలెన్స్‌ అధికారులు ప్రభుత్వానికి నివేదిక సమర్పించనున్నారు.

బాధ్యులెవర్నీ వదిలిపెట్టం: మంత్రి జయరాం

ఈఎస్‌ఐలో జరిగిన అవినీతికి బాధ్యులైన వారిపై చట్ట ప్రకారం చర్యలు తీసుకుంటామని ఏపీ కార్మిక శాఖ మంత్రి గుమ్మనూరు జయరాం స్పష్టం చేశారు. గత ప్రభుత్వ హయాంలో ఈ అవకతవకలు జరిగాయన్నారు. విజిలెన్స్‌ నివేదిక ఆధారంగా నిందితులపై చర్యలు తీసుకుంటామని చెప్పారు. అక్రమంగా చెల్లించిన బిల్లుల సొమ్మును రికవరీ చేస్తామని.. మాజీ మంత్రి అచ్చెన్నాయుడు సహా ఈ అవకతవకలతో సంబంధమున్న ఎవరినీ వదిలిపెట్టబోమని మంత్రి స్పష్టం చేశారు.