గతంలో ఎన్నో కమిటీలు వేశారు.. ఏమైంది?

ట్విటర్‌లో లోకేశ్‌

అమరావతి: గత ప్రభుత్వ హయాంలో తీసుకున్న పలు నిర్ణయాలపై దర్యాప్తునకు సిట్‌ ఏర్పాటు చేసిన నేపథ్యంలో తెదేపా జాతీయ ప్రధాన కార్యదర్శి నారా లోకేశ్‌ స్పందించారు. విచారణలు, కమిటీలతో చంద్రబాబును గతంలో వైఎస్‌ రాజశేఖర్‌ రెడ్డి ఏమీ చేయలేకపోయారని ట్విటర్‌లో పేర్కొన్నారు. గత తొమ్మిది నెలల్లో జగన్‌ కూడా ఎన్ని కమిటీలు వేసినా ఏమీ చేయలేకపోయారన్నారు. మంత్రివర్గ ఉపసంఘాలు, అధికారుల కమిటీలు వేసిన జగన్‌.. తాజాగా సిట్‌ వేశారనీ.. సాధించేదేమీ లేనప్పుడు సిట్‌లతో కాలక్షేపం చేయాలని చూస్తున్నారంటూ ఎద్దేవా చేశారు. రేషన్‌ కార్డులు, పింఛన్లలో కోతలు వేశారనీ.. వీటిని పక్కదారి పట్టించేందుకే సిట్‌ అంశాన్ని తెరపైకి తెచ్చారని లోకేశ్‌ ఆరోపించారు.