‘రూ.500 ఇస్తాం.. గుడ్లు, టమాటాలు విసరాలి’

అలా వైకాపా పెయిడ్‌ ఆర్టిస్టులు దాడి చేశారన్న వర్ల

విశాఖ: చంద్రబాబు పర్యటనను అడ్డుకునేందుకు ఒక్కొక్కరికి రూ.500 ఇచ్చి తీసుకొచ్చారని తెదేపా నేతలు ఆరోపించారు. వైకాపా నాయకులు తీసుకొచ్చిన పెయిడ్‌ ఆర్టిస్టులు చంద్రబాబు కాన్వాయ్‌పై కోడిగుడ్లు, టమాటాలతో దాడి చేశారని తెదేపా నేత వర్ల రామయ్య విమర్శించారు. తెదేపా కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ... చంద్రబాబు కాన్వాయ్‌పై దాడికి పాల్పడటం హేయమైన చర్య అన్నారు. భవిష్యత్తును తలచుకుంటేనే భయపడే పరిస్థితి తీసుకొచ్చారని ఆవేదన వ్యక్తం చేశారు. 
‘‘ఎగ్జిక్యూటివ్‌ క్యాపిటల్‌ సినిమాకు జగన్‌ ట్రైలర్‌ మాత్రమే ఇవాళ చూశారు. విశాఖలో జగన్‌ పాలన ప్రారంభమైతే ఆ సినిమా ఇంకెలా ఉంటుందో గ్రహించాలి. చంద్రబాబు పర్యటనను 10 రోజుల ముందే ప్రకటిస్తే ప్రభుత్వం చర్యలు తీసుకోలేదు. అడ్డుకుంటామని మంత్రులే ప్రకటిస్తే వారిని ఎందుకు అరెస్టు చేయలేదు. ప్రశాంతంగా ఉండే విశాఖకు పులివెందుల సంప్రదాయం తీసుకుకొస్తున్నారు’’ అని వర్ల రామయ్య విమర్శించారు. చంద్రబాబు పర్యటనను అడ్డుకునేందుకు పసుపు చీరలు కట్టుకున్న వైకాపా కార్యకర్తల వీడియోలను వర్ల రామయ్య విడుదల చేశారు.