స్థానిక రిజర్వేషన్లపై సుప్రీంకు తెదేపా

దిల్లీ: ఏపీ స్థానిక సంస్థల ఎన్నికల్లో బీసీ రిజర్వేషన్లపై హైకోర్టు తీర్పును సవాల్‌ చేస్తూ తెదేపా సుప్రీంకోర్టును ఆశ్రయించింది. ఆ పార్టీ ఎంపీలు, నేతలు అత్యున్నత న్యాయస్థానంలో స్పెషల్‌ లీవ్‌ పిటిషన్‌ దాఖలు చేశారు. సీఎం జగన్‌ కావాలనే వ్యూహాత్మకంగా బీసీలకు అన్యాయం చేస్తు్న్నారని.. తన అనుచరులతో హైకోర్టులో పిటిషన్‌ వేయించారని తెదేపా నేతలు ఆరోపించారు. సుప్రీంకోర్టులో తమకు తప్పకుండా న్యాయం జరుగుతుందని భావిస్తున్నామని ఈ సందర్భంగా ఎంపీ రామ్మోహన్‌ నాయుడు ఆశాభావం వ్యక్తం చేశారు. బీసీలకు జనాభా ప్రాతిపదికన రిజర్వేషన్లు కొనసాగించాలంటూ తమ పార్టీ నేతలు కొనకళ్ల నారాయణ, కొల్లు రవీంద్ర, నిమ్మల కిష్టప్ప, పల్లా శ్రీనివాసరావుతో కలిసి పిటిషన్‌ దాఖలు చేసినట్లు ఆయన వివరించారు.