వైద్యులకు భరోసా కల్పిస్తాం: తలసాని

హైదరాబాద్‌: సికింద్రాబాద్‌ గాంధీ ఆస్పత్రిలో వైద్యులపై జరిగిన దాడిని హేయమైన చర్యగా మంత్రి తలసాని శ్రీనివాస్‌ యాదవ్‌ అభివర్ణించారు. గురువారం గాంధీ ఆస్పత్రిని ఆయన సందర్శించి అక్కడ కరోనా బాధితులకు అందుతున్న వైద్య సేవలు, దాడి ఘటనకు సంబంధించిన వివరాలను వైద్య సిబ్బందిని అడిగి తెలుసుకున్నారు. ఈ సందర్భంగా మంత్రి మాట్లాడుతూ.. వైద్యులపై ఎవరైనా దాడికి పాల్పడితే కఠిన చర్యలు ఉంటాయని హెచ్చరించారు. ప్రస్తుత సమయంలో వైద్యులు వారి ప్రాణాలను పణంగా పెట్టి మనకు వైద్యం అందిస్తున్నారని.. వైద్యులకు భరోసా కల్పిస్తామని మంత్రి హామీ ఇచ్చారు. గాంధీ ఆస్పత్రిలో ప్రత్యేకంగా పికెట్‌ ఏర్పాటు చేశామన్నారు. ఆస్పత్రి పరిసర ప్రాంతాల్లోని యాచకులను వేరే ప్రాంతాలకు తరలించనున్నట్లు చెప్పారు. దిల్లీలోని నిజాముద్దీన్‌ ప్రాంతంలో జరిగిన మతపరమైన సమావేశానికి వెళ్లి రాష్ట్రానికి వచ్చిన వారిని దాదాపు గుర్తించామని మంత్రి తెలిపారు. ఇంకా ఎవరైనా ఉంటే స్వచ్ఛందంగా ఆస్పత్రికి వచ్చి కరోనా పరీక్షలు చేయించుకోవాలని మంత్రి తలసాని విజ్ఞప్తి చేశారు.